Klook老闆賣樓圓創業夢

【人物專訪】
香港樓市瘋狂，甚至孕育出「有樓有高潮」的驚世價值觀。當不少港人捱生捱死為上車，有人卻選擇賣樓創業，結果擁有一間業務遍全球80個城市，最新獲紅杉資本牽頭融資2.3億元的初創企業。旅遊產品預訂平台Klook聯合創辦人兼總裁王志豪（Eric）明言：「冇賣層樓就冇今時今日呢間公司」。

棄大行分析師職位

Eric為毛里裘斯華僑，父母均為香港人，然後赴美讀大學，再回港加入摩根士丹利出任分析師。至2012年初，只有24歲的他，就已成功靠自己上車，斥逾百萬元積蓄作按揭，買入半山荷里活道當時價值千餘萬的單位。外人看來，他稱得上是人生贏家，不過，為圓創業夢，他決定放棄這一切，包括層樓。
他表示，2013年到尼泊爾旅遊時，「我訂機票、酒店好快，但我book當地行程搞咗一個星期。」由此發現商機，冀建立一個平台助旅客預訂local tour、景點門票、交通車票等，自己創一番事業。不過要創業，首先要有本，「我好儍仔去追夢，所以quit投行，但都唔夠錢……我本來有筆錢，但買咗層樓冇晒，所以一定要行賣樓呢一步。」當時層樓升值超過15%，Eric扑槌賣出，套現後瞓身與林照圍、熊小康，斥約300萬元成立「自助遊神器」Klook。

他們以香港作為首站，主動向不少旅遊服務供應商叩門，當然吃下不少閉門羹，「我哋第一個供應商教造點心，佢本來係教香港人整蛋糕，啲班係夜晚，跟住我同佢講，反正你日頭都吉咗喺度，不如開個班教遊客整點心。」
由點心班開始，到現時海洋公園、香港迪士尼、港鐵等機構都與Klook有合作；由香港作為首站，至現時已涵蓋世界共80多個旅遊目的地，在台北、新加坡、深圳、首爾、曼谷、吉隆坡和馬尼拉設立辦公室；至於Eric亦由一層樓的業主，變成一間旗下員工200人的初創老闆。

今次紅杉資本牽頭3,000萬美元投資，他表示是用數據去說服對方，Klook的增長潛力。事實上，早於2015年6月及10月，四個月內完成兩輪融資，投資者星光熠熠，包括騰訊（700）高級副總裁吳宵光、「紅籌之父」梁伯韜等，「前一班既投資者，佢最睇好既一樣嘢，係我哋有心。我點證明有心呢，我辭咗份投行、賣咗層樓去開始呢盤生意，已經擺哂啲錢落去，佢哋仲有咩輸呢？」
今日的樓價，已與他12年買樓時不可同日而喻，現時更要交租，租一個比當年買入更細的單位，被問到曾否「呻笨」，「以前俾媽咪哦我時有少少，始終驚做錯決定呢。但喺賣嗰一刻，辭埋職，就決定要瞓身，嘗試去ignore市場聲音」，他笑言，「但媽咪一定會喺身邊吟噚。」

記者：倪敏慧