靚太開素食超市　醬汁零食樣樣齊

12.04.2017

近來巴西凍肉事件弄得人心惶惶，每個人食肉前都問清貨源來自那個國家，其實想食得健康又安心，嘗試一些素食食品也是不錯的選擇。 80後的 Zoe在 16年創辦了大力譚哥素食專門店，這裹尤如一間素食超市，店內供應過千款的素食食品，讓客人可以搭配出不同的菜式，絕對能滿足各人的口腹之欲，為追求健康的都市人提供多一個選擇。

踏入屯門的大力譚哥素食專門店，琳瑯滿目的食品，想不到素食竟有這麼多款式，創辦人 Zoe說︰「我哋店內有凍肉、零食、乾貨、醬料等過千款嘅素食食品售賣，售價由$10至$1,000不等。其實?家食齋都有好多變化，除咗素雞素鵝外，連魚生、咸魚都有素，唔只老一輩嘅客人，都有唔少年輕人幫襯我哋。」
大力譚哥素食專門店創辦人 Zoe，原是從事文書工作，創業的導火線竟是實現仔仔的夢想，「老公係經營齋店大力齋廚，平時我哋做嘢，仔仔主要由爺爺嫲嫲照顧，養成食素嘅習慣。?家個仔 7歲，有次問佢大個咗想做咩，因老公姓譚，仔仔就話想開好多間叫譚哥嘅素食店，令多啲人食素，就會冇咁多殺生。最初都係當玩笑咁聽，但諗番嚟幫襯齋店嘅食客，有時會問我哋有冇素食食材賣，有一定嘅顧客基礎，我都想推廣素食文化，最後決定辭職全職去創業。」

開業入貨遇人不淑

Zoe租下了素食店樓上的單位，在她的計劃中，大力譚哥原本在 16年 1月就開業，但在遇人不淑下延遲了 3個月，「開業前，喺朋人介紹下搵咗間貿易公司搵貨源，問幾時有貨，佢哋都係答就快有，拖到裝修完都未有消息，我覺得再咁等唔係辦法。我哋做開齋店都知啲貨喺台灣拎，就自己飛過去搵人傾，但好多聽到貨量少又要運去香港，都嫌麻煩傾唔成。去到最後我拜託一位住台灣嘅朋友幫手，佢負責搵貨源及運輸先解決到問題，推遲咗成 3個月先開到業。」
由打工變為創業，沒有宣傳經驗的 Zoe，為了推廣大力譚哥花上不少時間去摸索，「有派傳單、通函郵寄，我哋仲開埋 facebook專頁做宣傳。最初唔識，就咁影啲產品相再加句新入貨，叫大家嚟買，但反應唔大。後期慢慢摸索到 post文要加實用資訊，例如件產品有咩營養、點樣烹調等，會吸引多啲人去睇，點都要用錢去推 post落廣告，先會多人睇到。」

醬料受歡迎

現時店內過千款食品，以素肉乾、素魷魚片、無五辛的醬汁等最受歡迎，但 Zoe也試過入了一些滯銷的貨品，她表示客人口味難捉摸，「我哋入咩貨前會試食咗先，覺得好先入貨，亦會搜刮多類型嘅商品，畀客人多啲選擇。其中以素肉乾及無五辛的醬汁最受歡迎，一日賣到 10件 8件。但有啲貨你覺得好，其實未必啱客人口味，好似入過有機糙米及朱古力米酥，客人會覺得太普通或太新而冇人買，我會做啲推廣散貨，好似畀客人試食或者 sell番呢款食品有咩好處。」

為了推廣素食， Zoe不斷為店內加添新款貨品，希望吸引更多人光顧，「?家嘅款式比最初開店時多咗 1倍，有時客人話某個牌子好食，我就入貨試下，好似素鹹魚都有 5款，想畀客人多啲選擇。另外，齋店有賣開素盆菜，但我覺得可以加啲新意，就設計咗至潮盆菜，材料用獅子狗魚蛋、串燒、燒賣、熱狗腸等素食，年輕人會鍾意食，增加新意，客人可以喺我哋店上訂到。」

推出素食糕點

為了做好大力譚哥， Zoe最近親自落手製作素食糕點，「有客人話有冇啲冇蛋及奶嘅糕點，本身想入貨但都搵唔到有人做批發，於是前個月，我飛去台灣搵當地一個專做素糕點嘅師傅學習，學整 Tiramisu、鳳梨酥等，返嚟香港再喺屋企試咗成個月覺得冇問題先推出。最近客人可以訂鳳梨酥，反應好好，嚟緊我會再陸續推出唔同嘅糕點，希望得到更多素食者嘅支持。」