設計師製木家具　玩味設計攻中產客

廿一由八是一間木製家具店，在火炭開設了一間 2千多呎的工作室，創辦人 Thomas表示有不少人士願意花費，佈置新居，「我哋嘅木製品全係人手製，採用美國入口嘅木材，每件家具售價由$1,000至$30,000不等，客人多數係新婚買樓要佈置或者中產人士，以電視櫃、書枱嘅訂單最多。」

有設計底子的 Thomas，會在作品上加上巧思，不但有設計感還具實用性，「之前幫個客人設計電視櫃，佢話個女幾百厭，成日亂禁佢啲音響，我幫佢設計咗可以關起音響嘅百葉櫃，不但有保護作用，仲留有空間畀訊號通過。」

英國街頭撿木板

今年 33歲的 Thomas是讀廣告設計出身，從事廣告設計數年後轉為平面設計師，發現自己所學的不足， 12年，他決定去倫敦深造平面設計，「將工作以嚟儲落嘅錢拎去交學費及旅費，途中我識到一樣由香港嚟讀設計嘅 Vera，之後我哋夾份租屋，但家中得兩張凳，喺生活上都幾拮据。於是我落街撿木卡板，上網睇教學，整咗張木凳，手工係幾粗糙，但招呼到朋友。」

自此 Thomas對木工產生了濃厚的興趣，他更到地攤買二手木工工具，上 YouTube學刨木及請教當地的木工。「我試整木製筆盒，仲寄返香港寄賣，當時整咗十幾個，每個售$400， 2個月內賣晒。」

幫朋友造全套傢俬

在 Thomas準備回港前，有一位英國朋友搬屋，找他訂造一套傢俬。「由度尺寸、買木材、開刀刨木到製作，全部係我同 Vera一齊製造，因為冇機器幫手， 90度角位、水平位都係慢慢刨出嚟，每日整足 7、 8粒鐘，用咗 3個月先交到貨，整咗衣櫃、茶几、書枱、書架等 8件木製傢俬，朋友都幾滿意。」

15年回港後， Thomas租了火炭的一個單位，開設廿一由八工作室，與女朋友 Vera一起從事木匠工作，「其實都幾大膽，我用晒之前喺英國完成訂單賺到嘅 8萬嚟交租及按金，不過我想趁後生做自己想做嘅事。加上喺英國時已經建立咗廿一由八嘅 facebook專頁，儲咗一啲捧場客，當我話經營呢個事業時，無幾耐就接到訂單。」

開班增加收入

建立品牌不是一條易行的路，首先要解決租金、日常開支等問題。初期訂單不太穩定， Thomas要開筆盒及木凳班來增加收入，「參加者由 20歲至 50歲嘅男女都有，但大都係新手，自己整咗唔少模具，方便第一次接觸嘅人可以完成到個作品。雖然只係教，但成堂要睇實驚佢哋整親，精神壓力大過自己整。」

由設計師變為木匠， Thomas表示以前坐 office畫圖，現在要落手落腳去做，工作上辛苦過以前，「平面設計多數係設計推廣活動，期限會較短；但造傢俬會放喺客人家中好多年，客人與產品之間會有較強嘅連結，想到客人將我嘅作品融入佢哋生活中時，幾有成功感。」

發展到今天，廿一由八已變成了 4人的工場， Thomas希望讓更多人認識這個品牌，「而家人手多咗，想重新規劃製作流程，增加生產效率。而家每月約有 4至 6張訂單，仲想做多啲推廣活動，好似品牌合作或展覽等，畀更多人認識我哋。」