學煮學入貨 開小食店免碰釘

俗語說工字不出頭，不少打工仔都想透過創業闖出另一片天，當中以小食店作起步為熱門之選，但我們每日接觸的飲食業並不是想像般簡單，避免創業時才來碰釘，可先報讀坊間的小食店創業課程，學製多款街頭小食及了解店鋪運營的技巧，為創業作好準備。

剛於葵涌廣場開業的小食店「友好嘢食」，主打咖喱小食，創辦人阿充原從事物流工作近20年，但一直希望創業開小食店。「年幾前，我開始準備，好似練習廚藝及留意相關嘅資訊。喺半年前，我仲報讀仁愛堂舉辦嘅街頭小食創業證書課程，學習店鋪運營及了解行業嘅狀況，之後就辭工同兩位朋友一齊創業。」

5分鐘內給客人

阿充表示這是他首次創業，所以店鋪的日常運作及食物處理工序，大多來自課程導師的教導，再因時制宜而來，「導師有講過食物最好先加工一部分，等客人落單後再煮熟及完成最後嘅工序。我哋提供嘅食物以肉類為主，如果由生煮到熟要約15分鐘，所以我跟導師嘅建議會預熱咗先及切好晒材料，將時間控制喺5至8分鐘內就畀到客人，客人就唔使等太耐。另外，喺食材供應上，現時我都有用緊導師喺堂上介紹嘅供應商，對於唔識門路嘅新手嚟講，會幾有幫助。」

固定步驟保持品質

課程由從事餐飲業10年的Fire親自教授，課堂上會教授學員製作多款香港本土小食，及有關創業的知識。「我會教整咖喱魚蛋、雞蛋仔及碗仔翅等小食嘅製作方法，亦會教整多款醬汁，當中會講解做生意與屋企煮嘅分別，最好用簡單及有固定步驟嘅方法嚟製作，會容易教導員工及易於保持食物水準。我仲會講解點樣預計材料嘅分量，及保持食物溫度嘅方法等。」

教寫計劃書

Fire表示創業是一門計算，所以他會詳細教學員寫計劃書，包括風險評估、資金運用、利潤及選址等。「現時以100呎嘅鋪位嚟計算，開業成本約50至60萬，當中食材成本最好控制喺開支嘅25%至30%內，如果唔係好難回本。喺選址上，亦會影響小食嘅種類，如果開喺工廠區內，腸粉、撈麵等飽肚嘅小食會比較好賣；如果多寫字樓客幫襯，就以製作魚蛋燒賣等流程快嘅小食較受歡迎。」

資料來源：青雲路