90後唔做律師創業印卡片 10萬本3個月回本 每月生意額近百萬

倫敦國王學院法律系

畢業 一聽到今次受訪者在英國倫敦讀大學、畢業於King’s College London倫敦國王學院法律系，一個「有父幹」、帶點輕浮的富家子弟形象即時浮現。 然而初次見面，出現在眼前的「90後」Wilson卻是個彬彬有禮、笑容可掬的年輕人，言語間更露出該年紀才會出現的稚氣，現實與幻想往往有落差。 事實上，Wilson確是出身於富裕家庭，自小受父母悉心裁培，他今次創業雖成功，但中間卻捱過不少苦頭。

Wilson笑言，創業初期壓力極大，父母亦曾因他選擇放棄做律師去創業而有所不滿。

爸爸似「寵物小精靈」想儲徽章

說到當初為何會選擇修讀法律系，他說，因為家姐是會計師、哥哥也是律師，所以爸爸都「好似『寵物小精靈』咁想儲徽章！（想子女們）一個會計師、一個律師、一個醫生！」 但他認為醫生要起碼讀5年，如果自己唔適合就會浪費時間，加上覺得「阿哥都做到律師，自己唔可以輸俾佢」所以最後都揀法律來讀。 Wilson說他選修LLB LAW，「一開始我都係諗住做事務律師，因為我都係對商業方面比較有興趣，同埋好似個個都揀呢個讀、有啲羊群心理，後尾自己實際去大律師行做過實習後就發現『唔係好對路、唔係好適合！』」

90後Wilson畢業於King’s College London倫敦國王學院法律系，但唔做律師回港創業。

唔做律師回港創業印卡片

他續指，與好多人讀Law一樣，當時覺得讀Law好有威嚴、幫到好多人、收入亦可觀，但讀過及做過後就發覺其實不然，而且工作好沉悶。「無論你做嘅有幾多、做得幾好，最後你都好似只係大公司內一粒齒輪仔，付出同收入唔係好成正比…返工時每日只係『做做做』但唔知自己做緊乜嘢！無一個大Picture！」他說。從對話中可以感到他當時的無力感，其實這正正是天下間所有打工仔的心聲，我又何嘗唔係公司裡面的一粒小齒輪呢！最後Wilson放棄做律師，回流返香港創業。家人知道後當然反對，身邊朋友都大感可惜，始終他已花了3年時間去完成法律學士學位，也當過幾個月見習事務律師。他指：「父母反對，大部分人都覺得浪費，但如果因為果3年時間而以後都要做一啲我唔鍾意嘅嘢，對我嚟講更大嘅浪費….而且我覺得而家趁後生唔試，將來到三四十歲先試嘅機會成本就大好多！」有錢可以任性！年輕都係！

Wilson最初選擇讀Law是因為「阿哥都做到律師，自己唔可以輸俾佢」！

英國賣公仔麵俾同學仔賺錢

事實上，Wilson確是有點家底，但非可以亂使錢的富二代，他指父母一向對他非常嚴格，當年在英國讀寄宿期間，父母一星期只給他20英鎊（大約二百多元港幣）零用錢，而且已經覺得「俾多佢」，他學著父母的口吻說：「寄宿學校使乜用咁多錢呀？」 他續指，因為寄宿學校是全包的（包食宿），但他們不明白寄宿學校「啲嘢好難食，每餐只有薯仔同幾粒肉咁。」 他不好意思的說：「咁果陣就想要多啲錢，所以就喺香港買啲零食返英國賣俾同學，例如一包公仔麵香港買兩三蚊，返到英國賣二三十蚊都有同學會買…用一包公仔麵換一個Take Away都好！」 到大學時，Wilson的「賣零食生意」模式變得更刁鑽，他將在香港購得的大包糖果、餅乾分拆開「一粒粒、一小包咁賣」給低年級的同學，他說收入更可觀！ 他的生意頭腦，原來早在讀書時已經浮現。

中六時，在英國讀寄宿期間，父母一星期只給他20英鎊（大約二百多元港幣）零用錢，而且已經覺得「俾多佢」！

10萬元儲蓄創印刷平台印卡片

Wilson創立的印刷平台JoinPrint，定位在平價高質市場。 他指，開始想創業的原因是在大學時有個叫Chinese Society，「成班中國人一齊玩，有好多活動，當時主要負責印活動單張、製作入場券等，接觸到好多有關印刷的東西，發現印刷品要設計得好、印得靚其實大有學問，而且應該有市場，所以回到香港就嘗試創業。」 回到香港，拿著10萬元儲蓄創業，一切由零開始，「首先我找了一個Programmer、一個Designer，Programmer幫我寫網站，而Designer就幫我Design網站嘅版面同產品嘅設計，因為我哋網站提供唔同嘅卡片設計，俾一啲One Man Company可以自行選擇適合卡片設計模版，訂造印刷卡片。」 如果客人已有自家的卡片設計，又可以使用網上的上載系統，上載該卡片設計檔案，輸入印刷數量和其他細節便可以。他認為他的印刷平台比其他同行優勝之處在於平價得來品質有保證，例如紙質方面全部用最好的，而且不是「乜都印」，公司提供的印刷品都是「最精美」的東西，確保客人得到的都是最好的品質。

此款像三文治有「夾心層」的特厚卡片，是JoinPrint獨有的設計。

夾印刷廠以分成形式做

話說回來，區區10萬元如何開到一家印刷公司？Wilson解釋，「其實一開始成本好低，一開始唯一最大支出只係請Programmer同Designer，工作地方則是租借親友的辦公室。因為我係夾印刷廠以分成形式做，即係當我接到單先分成俾印刷廠，例如張單有$1,000，我就要分$200俾印刷廠。」雖說創業3個月已極速回本，但Wilson指公司發展非一帆風順，營運初期其實零生意了一段時間，撞板與挫折同時都有很多。「一開始公司就只有3個人，無自己的生產線，而且只是利用印刷廠夜班的Part time 『攝單咁印』，夜班的時間是下午6pm至3am，為咗Make sure佢全部嘢都印啱，所以我每晚都留守到最後即係凌晨3點，然後第二朝8點又返工，包裝、運輸都一腳踢。」一點也不輕鬆。

父母指罵難聽過粗口

成立初期經常撞板，客人致電回來投訴是經常發生的事，由印刷品質素不均、墨水脫色，甚至來稿出錯以致成品出錯都試過，Wilson說他都會無條件為客人再造過。「有一次我好幸運咁接咗一張十幾萬嘅大單，點知接咗之後先發覺合作開嘅印刷廠都正趕緊一批貨，最後要靠朋友幫忙，即日搬晒所有嘢去另一家印廠先趕得切交到貨俾客人。」最令他氣餒的是每日回家，父母與他都會因他放棄做律師而鬧交，指罵他的說話絕對難聽過粗口：『都叫你做律師架啦！』、『你而家搞呢啲每日喺度燒錢！』、『後生仔應該儲經驗呀嘛！搞埋呢啲嘢做咩吖！』、『你不務正業！身在福中不知福！』…Wilson指經歷了大約兩個月生意不穩定加每日與父母鬧交的日子，「搞到我連屋企都唔想返，佢哋完全係恨鐵不成綱。」

創業近一年半，公司由3人的規模發展至現在有10人，生意增長平均每月達80%。

每月生意額接近7位數

到後來開始接到單，公司生意趨向穩定，家人態度才開始軟化，不再將他與哥哥及姐姐比較，至現時家人是100% Support他。 Wilson說公司的所有客戶都是透過網上搜尋找到他們的，2017年初創業時以個人客戶為主，現時大至連卡佛、東瀛遊等大公司都是其客戶，「農曆年時，曾接過一家大公司印製利是封的過百萬大單，此後就多了很多客人介紹的客戶，現時公司每月生意額接近7位數，每月盈利都有6位數。」 在這個創業例子中，說明了有錢及年輕可以任性，而「有父幹」都要靠自己的努力才能成功。

參考來源:ED Smart經濟一週