趁租金低　搞運動用品特賣場

 

 

當日一激貿易有限公司創辦人及董事總經理的 Eric巡鋪，他由觀塘辦公室出發，先去了旺角的特賣場，其後再去了紅磡店，「目前我哋主要做緊運動用品嘅零售生意，會搞特賣場及有自己嘅鋪頭，呢一年間，前後都搞過六十幾次特賣場。平時喺 office會與同事商討入貨、定價及人手安排嘅事宜，有時間就會落鋪頭幫手。」

今年 38歲的 Eric，中五畢業後，便加入零售業，「做過時裝、運動用品、生活用品等品牌，最初由售貨員做起，自己外表望落唔係特別醒目，講嘢唔叻，試過俾阿姐話：『點解你咁蠢！』反而激起我想做好份工，觀察業績好嘅同事點 sell客，點貨執貨都做足，慢慢做到去店鋪經理，之後做過買手、 trainer及零售經理，一做就成 20年。」

 

放長假唞一唞

16年頭，工作多年的 Eric決定辭職，放一個長假去旅遊，「當時零售市道唔太好，自己做咗咁多年，都想停一停去吓旅行，放一放鬆。期間有朋友問我之後乜嘢打算，會唔會做番零售，當時開始思考之後條路點行。」

雖說是零售市道寒冬，但 Eric覺得這反而是一個不錯的創業機會，決定在 16年中成立一激貿易有限公司，經營零售業務，「租金比高峰期跌咗 30%至 50%，開業成本冇咁大，有空間發揮，我搵咗有多年零售業工作經驗嘅朋友加入。當時消費者會偏向買平嘢或專業嘅功能用品，我知道唔少運動品牌供應商會積存前幾季嘅貨物，但冇人手去清貨，存倉又要錢。我及同事對搞特賣場有經驗，於是利用人脈同佢哋傾合作，搞特賣場幫佢哋清貨，同時又滿足到有需要嘅客人。」

 

旺角街頭抬橋宣傳

Eric希望以特賣場打響品牌名堂，花了不少心思在宣傳上，「坊間不時都會舉行特賣場，要令人記住就要有創意。我鍾意日式風格，喺宣傳設計上都係走呢條路線，除咗喺報章上落廣告外，又模彷日本祭典，搵 model喺西洋菜南街抬神橋，一邊向途人派傳單。個反響唔錯，令到唔少人認識到我哋。」

憑着吸睛的宣傳，一激特賣場得到不錯的成績，隨後 Eric在紅磡開設固定 outlet及實體店，「搞特賣場只係第一步，另外亦會發展自己嘅零售鋪頭，我對運動品牌較熟悉，所以由做零售運動用品做起。我有視察過紅磡，見區內嘅運動店唔多，最近都要行到黃埔，於是揀咗置富都會開店，除咗坊間常見嘅運動衫、褲及運動用品外，我哋都嘗試去唔同國家發掘少見嘅商品，好似泰職、澳職嘅波衫，希望有啲賣點。」

 

與同事相處似朋友

經營零售業，人手十分重要，有 20年經驗的 Eric笑言也不敢「教」同事工作，「以前上司鬧你，叫你做嘢，做細嘅點敢駁咀，乜都要做。但?家鬧同事多幾句，可能轉頭就收到佢 WhatsApp話唔做。?家與同事相處要好似朋友咁，我時常落鋪同佢哋傾偈， sell客摺衫執貨乜都會做，見到同事做得唔好，唔會直接話佢，會建議佢點做會好啲，如果佢哋有心學都會自己偷師。」

Eric表示過去一年，公司的營業額約 2千多萬，成績不俗，將計劃擴充業務，「年底會喺杏花邨、鑽石山及佐敦開分店，除咗運動用品外，仲會引入露營用品，好似帳幕、野外煮食用具等。?家市場上對呢類產品有需求，將來打算發展更多唔同類別嘅零售店，好似玩具、時裝、家庭用品等，希望建立一個零售王國。」

資料來源：青雲路