本地 3D Print手袋品牌 轉戰網上月賣 6千個手袋
品牌建立是一件長久而艱辛的工作，原是從事銀行工作的 Stanley，在 97年金融風暴後毅然轉行，投身手袋貿易生意，其後在 09年創立香港手袋品牌 Mousse，主打動物、風景等 3D print手袋，一推出已很受女士歡迎，品牌得以高速發展。雖近年步入零售業寒冬，但他求存求變，把公司業務轉向網上商店，轉營的成功讓品牌得以逆境發展，現時在線上線下都得到不錯的成績。
Mousse是一個香港手袋品牌，主打 3D print手袋， Stanley說︰「雖然 3D print可以隨意為手袋印上唔同嘅圖案，但我哋主要用動物、風景及金屬紋理為主。?家我大多做決策及統籌嘅工作，亦會與同事傾吓產品開發，我不時飛去德國、美國等地參加時裝展，留意潮流興緊乜嘢。」
Stanley在英國修讀金融系碩士， 91年畢業回港投身銀行業，直至碰上 97年金融風暴，市道轉壞，讓他開始思考轉行，「好多生意客戶都做唔住，銀行又要你跑數，壓力好大，開始諗吓有乜嘢路數可以做。工作時識到一班造成衣及服裝配件嘅內地廠家，不如試吓開公司做貿易及代工，幫佢哋打開外國市場。喺 00年，我成立咗軒昇公司，自己拎住啲手袋、絲巾、帽及手襪等貨辦，飛到德國、美國等展銷會搵商家傾合作，接單做代工。」
肯學肯變的 Stanley很快就在代工市場上找到定位，「 00年，我有次去美國洛杉磯嘅批發市場，我逐間鋪敲門搵生意，有個店家問我哋識唔識造 Fake Print手袋，有單上門我就梗係話識啦。但原來當時手袋 printing唔流行，好多廠都唔識整，我就上網搵資料，然後周圍搵人幫手，最後將印 tee嘅技術用喺手袋上，出嚟嘅效果唔錯，客人收到貨後好滿意，仲發現當時 3D print手袋喺歐美好流行，於是開始主力發展 3D print手袋代工嘅業務。」
雖然代工業務發展不錯，但 Stanley不想只為別人作嫁衣，他希望建立屬於自己的品牌，於是在 09年創立 Mousse，「因為我哋熟悉手袋印刷嘅技術，所以品牌都係走 3D print路線，袋款會係防水布袋，夠輕身及容量大，圖案印喺防水布上嘅效果亦最好。初時印上動物花紋、金屬鎖扣、各國風景等圖案，喺香港擺展覽時，已經有韓國商家對 Mousse有興趣，幫我哋引進去韓國嘅百貨公司度賣，所以 Mousse喺韓國賣先，搞到好多人以為我哋係韓國品牌。之後香港一田都有搵我哋合作，市場反應好好，喺 12年我哋已決定開實體店，好似尖沙咀、屯門、九龍灣等都有我哋嘅分店。」
市道最好時， Mousse在港曾有 13間分店，但 Stanley道出近年受零售業寒冬影響，令他結束了不少分店，轉而發展網上商店，「 15年尾市道開始轉差，旅客少咗，店鋪嘅生意差咗，考慮過租金成本後，決定減少分店數量，剩番山頂廣場及 K-11呢兩間實體店。之後開始搞成本較低嘅網上店，搵人整網站外，仲喺天貓平台開店，自己同太太都要學習網上購物嘅流程、點做網上宣傳等，?家實體店及網上商店生意各佔一半。」
現時 Mousse每月售出約 6千個手袋，每個手袋售價由$190至$880不等。 Stanley表示要時常推出新款來留住客人，「我哋每個月都會推出 3至 5款新袋，始終客人都係鍾意新嘢，嚟緊會繼續發展 online shop，好似我哋一直有度身訂造服務，客人畀張相我哋，就可以印喺手袋上。我哋仲會開發手機 app，令客人更方便去使用呢個服務。」
資料來源：青雲路
