大台搵唔到食 前藝員曾建怡轉行開花舍
近幾年大台的小生花旦約滿後紛紛離巢，除了上內地發展外，亦有好幾位選擇創業，靠自己搵錢。前藝員Elaine（ 曾建怡）亦不例外，曾當模特兒、參選港姐及演員的她，因一直的發揮機會不多，為有能力養得起自己，終於14年毅然解約離開大台，面對現實靠自己創業。她自小喜歡花藝，於是決心專注鑽研，並在今年7月開設網店怡心花舍，主攻製作花束、花飾及花球生意，成功轉行。
Elaine於12年參選香港小姐競選而入行當藝人。
藝人走出公仔箱後從事不同的職業，似是近年的大趨勢，Elaine表示：「我唔係成日有劇拍或有活動做，戶口試過得幾十蚊，真係養唔掂自己，所以決定離開大台，另謀出路。」
Elaine在大台工作時，曾拍過十多套劇集，圖為《無雙譜》的劇照。但她有感發揮機會不多，故於14年離巢。
09年，Elaine於嶺南大學歷史系畢業，並在12年透過參選香港小姐，加入大台當藝人，期間做過《情逆三世緣》、《老表，你好hea！》、《八卦神探》及《無雙譜》等劇集，但因發揮機會不大，只做路人甲乙丙丁，她考慮到生計與前景，便於14年毅然離去。「之後我做過化妝品、護膚品及香水專櫃專員，仲做過物業管理文書，最後都係想用自己嘅興趣去創業，下定決心由花藝入手。」
買完花回來後，Elaine需逐枝花篩選，才可進行插花的步驟，「將待用嘅花用水養住先，室內嘅溫度都要控制得宜，太焗會令佢好快開花。」
採訪期間，Elaine正製作花藝品，向記者介紹各種她常用的花，如庭園玫瑰、尤加利、竹球及百合等，「現時近畢業季節，開始接受預訂花束。近幾年興文青簡潔風格，所以我唔會用太多顏色嘅花。」她用心製作並對各花草的特性瞭如指掌，可見她真心的樂在其中。
只有Elaine一人打埋花舍，故她要兼任送貨專員。完成花球後，為免損毀，Elaine會用較大的箱送貨。「我會親自送貨畀客人，確保運送過程中唔會整爛。雖然成日走嚟走去及搬搬抬抬，但我見客人收貨滿意嘅反應，會幾開心！」
受爸爸薰陶
其實Elaine與花草的緣份早在小時候締結，「爸爸後生時喺政府做花王，佢成日會教我花草樹木嘅知識，好似白千層係一層層嘅，黃蟬、杜鵑及夾竹桃都係有毒，白蘭花好香，洋紫荊與宮粉羊蹄甲嘅分別係在於有冇豆等。」
Elaine（右一）小時候會去花卉展覽參觀爸爸的參展作品，「爸爸以前做花王，所以我細細個時，佢已經教我好多花草嘅知識。」
Elaine自言花草陪伴她成長， 去年搬家後，因家中的位置多了，所以她想用花粉飾一下，成為了創業的契機，「我想認真學一門手藝，喺今年2月去花藝學校正式學插花。」她表示上堂學習的知識，令她有很大衝擊，「插花唔單止配色，線條及形狀都好緊要。老師會教我哋做半球形、直立形、初月形、三角形及扁形等招式；另外，要注意花及襯花嘅比例、第一枝花嘅落腳位，拎花嘅手勢及準確性都好重要，仲有原來插花唔可以換手，左手要一直拎住花束，右手一直加花，咁樣先唔會變形走樣。」
Elaine每星期都會去2至3次花墟入貨，男朋友阿恆不時會陪伴她。阿恆表示：「嚟多幾次後，慢慢都會識分啲花名，覺得幾有趣，都好支持佢做呢門生意。」
去日本上花藝堂
不斷練習的Elaine，從花藝中確立自己的興趣及未來的目標，今年5月，她辭去物業管理的工作，全心為開網上花店做準備。「喺6月，我仲去咗日本大阪上咗幾堂花藝堂。我平時學嘅係歐式，學埋日式會知道日本偏向簡潔，作品好多時得一枝至幾枝花。」Elaine將兩種特色融會貫通，打算切合不同客人需要而再作調整。「我想揀一啲坊間少用嘅花，例如梅色嘅康乃馨、木百合、新娘花、庭園玫瑰及尤加利等。」
Elaine對花墟內每間鋪都十分熟悉，「買玫瑰就去呢間，買盆就去前面嗰間，會多啲款式。」
怡心花舍在7月正式開業，第一單生意是靠男朋友的媽媽介紹，用作送給朋友的生日禮物。Elaine說：「以簡潔為主，我用初月做主題，用白色百合砌咗一個放枱嘅擺設，佢哋都好滿意。」
喜歡以手作傳遞心意的Elaine，連咭片及感謝咭都是自己製作，希望客人能給予手作人一份鼓勵。
幫朋友整太陽襟花
Elaine主要透過facebook、ig及朋友介紹作宣傳，現時以花束及花球最好賣。「現時我主要做周年紀念、結婚及畢業嘅訂單。」她會為客人度身訂造，詳細問用途、場合及收花人的喜好才會進行製作，「試過有朋友結婚，搵我整襟花。佢好鍾意太陽花，但太陽花做襟花實在太大，我提議用太陽菊，但佢唔想，於是我就再搵，搵到迷你太陽花，滿足到佢嘅要求，好有成功感。」
由Elaine製作的結婚花球及襟花，售 $1,380起。
花舍開業至今約3個月，Elaine表示與當藝員最大的不同是，所有與花舍有關的事務都得自己一手包辦，「我會自己送貨、聯絡、搬搬抬抬，我練到好大力㗎！雖然係辛苦啲，但我幾enjoy！」
插花擺設 ，售 $1,380起。
保鮮花難處理
在營運上，Elaine一人暫時都可以處理，困難則出在保存鮮花上，「因為花有期限，客人愈早訂我就愈有時間安排幾時買花。買花除咗要睇佢由邊度運嚟外，之後仲要打理，控制濕度及溫度，令啲花喺客人收到時開花。我多數會選購日本直送嘅花，美國等太遠嘅國家，花喺飛機雪得太耐會好難開花。」
花束，$200起。
Elaine每星期會去2至3次花墟買花，視乎訂單多少而定。每月她約接二十多張單，花束收費由$200至$1,000不等，花球收費由$1,380起，花藝擺設收費則由$3,000起，每月約賺2萬。「好開心家人都支持我，我希望日後可以靠自己嘅生意養到自己，同男朋友食飯時可以AA制。」
客人Kit表示：「我就嚟結婚，喺facebook見到Elaine整嘅花束好簡約又靚，就搵佢幫我設計花球及襟花。佢會用心了解我嘅喜好，然後提供意見，例如唔同花嘅花期、顏色與婚紗嘅配搭等。」
Elaine很喜歡舞台表演，即使不做藝人，亦有持續參與舞台劇的活動，圖為她有份參演的仲劇團《呢劑，俾唔起》的劇照。
參考來源：青雲路
