由零開始 設計自家首飾品牌

原本不懂珠寶設計的Kellyn，憑着對珠寶的熱愛及理想的追求，創立KKLUE，更得到不少OL歡迎。

Kellyn表示自家的珠寶設計靈感源於對人生哲學、藝術及大自然，「Heroine係最新系列，方形石喺首飾設計中，多用嚟做配石，我就用方形石作主石，設計出耳環、頸鏈、戒指及手鏈等，靈感來自常被認為係配角嘅女性，只要懂得認清自己嘅價值及潛力，都可以好閃亮，成為人生嘅主角。」

KKLUE的首飾全是出自Kellyn之手，對於每個設計，她都費盡心思。

Kellyn現為KKLUE的創辦人及創意總監，她負責品牌的珠寶設計、宣傳、開拓銷售渠道及營運方向等。「客人主要係20歲至35歲嘅女士，我設計嘅首飾走簡約路線，每個系列都有獨特嘅理念，例如半圓、珠邊及旋舞等，女士返工及行街都可以用嚟配襯，售價由$1,000至$5,000不等。」

今年29歲的Kellyn在北京修讀商業管理系，其後在香港理工大學攻讀社會學碩士，12年畢業後，她加入了一間上市公司擔任主席助理，但她的心底卻藏着一個創業夢，「屋企人做生意，令我一直有興趣創業，但係冇方向。我決定打住工先，我工作嗰間公司有地產、珠寶及金融等業務，我主要負責跟進內地地產項目嘅投資，期間接觸到珠寶業務，開始對珠寶行業產生興趣。」

現時KKLUE在Lane's的不同分店設有零售點。

珠寶展找入貨門路

工作了3年，Kellyn希望趁年輕出來創業，決定投身珠寶設計行業，「自己對珠寶設計完全零知識，我去咗報讀鑽石鑑定、珠寶設計及平面設計等課程嚟增值自己，仲去行珠寶展認識鑽石嘅入貨門路。我喺展覽中認識一位印度嘅珠寶商，原本我想自薦做佢展覽期間嘅助手，但老闆知道我想創業後，竟然話可以借鑽石畀我，有客揀中咗先再畀錢佢，令慳咗創業成本，真係好多謝佢當初嘅支持。」

Lane's負責人Charles說：「我哋店內主要售賣歐美品牌嘅飾品，當時Kellyn拎佢嘅作品嚟傾合作，我覺得唔錯，有自己嘅設計意念，於是決定同佢合作。」

16年，Kellyn在中環租下一個2百呎的單位創立工作室，主打客製化婚戒。「最初幫身邊結婚嘅朋友設計婚戒，慢慢再靠人介紹。由設計、搵廠造模、修改，到最後完成都係自己親手跟足，令我摸熟咗首飾嘅製作流程。之後除咗婚戒外，亦有客人搵我設計埋頸鏈，回響仲唔錯。幫客人設計，要了解客人嘅喜好，慢慢摸到市場上流行嘅設計風格，亦令我發現價錢定位都好重要。」

17年，Kellyn決定將工作室模式變為品牌發展，創立KKLUE，推出自家設計的首飾，以簡約設計為主。「我唔再造客製化婚戒，變為推出自家產品，仲揼咗個網站出嚟做online store，有人訂就寄畀佢哋。」

初創業時，Kellyn表示產品照也是由自己拍攝，「為咗慳錢，自己要學埋影相及退地，現時請咗員工後多數由佢哋影番。」

客人愛看實物

Kellyn發現客人始終愛看實物，於是尋找新的銷售渠道，「唔少客人反映想拎上手睇吓，但開實體店成本太高，於是我搵寄賣點。我周圍去飾品店敲門傾合作，有啲唔回應，有啲就話唔啱，第一間傾成合作嘅係Lane's。」隨後，Kellyn亦成功與內地的Artoriz及AnyShopStyle等連鎖飾品店合作，讓KKLUE的在北京、深圳、武漢等地都設有銷售點。

上年11月，Kellyn推出3個新系列的飾品，她表示目前KKLUE的市場反應不俗，會着力於品牌發展，希望讓更多市民認識KKLUE，「新季度會推出更多系列嘅首飾，令品牌形象更清晰。現時正打算用珍珠作為設計主題，希望客人會鍾意；另外，我會開拓更多嘅銷售點，嚟緊3月喺北京會開pop-up store，想試吓開實體店可唔可行。除咗香港及內地市場外，我仲接觸緊美國、英國嘅代理，希望拓展到海外市場。」

點入行？

對於有興趣成為珠寶設計師的人士，Kellyn認為最好先修讀珠寶設計相關的課程，建立一定的基礎，「做珠寶設計基本要有繪畫設計圖嘅能力，同時最好對寶石有認識，喺設計上會更加得心應手。初入職會擔任助理設計師，視乎面試表現，月薪約$12,000至$20,000。」現時身為KKLUE創辦人及創意總監的Kellyn，每年收入約40萬。 

Imperfection系列 18k金Five chain耳環 （玫瑰金色） $3,800

Kellyn感悟不完美正是每一個人的獨特之處，於是Imperfection系列以缺角的圓來作設計主題。

Ballerina系列 18k金長耳環 （玫瑰金色） $3,600

Ballerina系列靈感來自芭蕾舞者，他們在舞台用舞姿吸引眾人目光，首飾以流線及優雅作設計。

Imperfection系列 戒指 $1,800

KKLUE的首飾主要以18K金打造，推出銀色、玫瑰金及金色供客人選擇，Kellyn說︰「香港人鍾意玫瑰金色，內地則以金色較受歡迎。」

參考來源：青雲路