大人の現具 開實體店賣眾籌產品

Damien（左）和Jonathan各負責不同工作，Damien說：「我主要負責marketing及策劃工作，Jonathan會跟project，另一位合伙人Larry就會做營運工作。」

「呢隻手表可以用app輸入你schedule咗嘅時間，然後指針表面會顯示黑色，如果9pm至10pm係白色空白嘅時間，即係得閒咁解。呢個吹氣腳踏係搭飛機時用，令到隻腳冇咁攰，仲有唔同高度，小朋友都用得！我哋個個月都試新產品，好似成日有新玩具玩。」採訪當日，Backer Stores的老闆Damien和拍檔之一的Jonathan，向記者介紹店中特色產品的使用方法，2人說得眉飛色舞，樂在其中。

Damien指店中大小的產品都有，「小至如可自然分解牙線，大至行李喼，大家就好似喺格仔鋪入面尋寶咁。」

網購成為現今消費的大趨勢，但沒有實物在手，大家一定有中伏的經驗吧？連Damien亦不例外，「未開店前，我成日有睇網上眾籌嘅產品，都有唔少得意嘢，但試過貨不對辦，又或者設計者最終生產唔到件產品出嚟。有次買咗個旅行收納袋，發現質地好差，都幾失望。」但中伏及失望的經驗，竟令他萌生創業的念頭。

部分電子產品會有專屬的電子屏幕，播放介紹短片，讓客人了解產品用法，並可以立即使用。

Backer Stores現以寄賣店的形式運作，與不同的網上設計者合作，讓他們在店內寄賣產品，Damien會為產品作各種宣傳及配套，如試玩會及產品講解會等活動。「每次設計者只會放50至100件貨喺我哋度賣，並唔係由我哋去買佢哋嘅貨，我哋所承擔嘅風險唔大，唔擔心有砸貨嘅問題。」每賣出一件貨品，他們便會以拆賬形式收費，現與他們合作的品牌已超過100個，「生意有8成嚟自實體店，其餘兩成為online銷售。」

可以用手指在耳筒上直接控制選曲及調整音量。FIIL Canvis 智能高音質耳機 $1,799

旅行電子產品好賣

Backer Stores位於尖沙咀的K-11，Jonathan表示旅行用品、兒童用品及電子產品等最好賣，「好似摺合式嘅喼、可飼養電子寵物嘅水壺、內置GPS嘅電子表及有details嘅背囊等都好好賣。當中摺合式喼喺3個月內就賣咗300個，吹氣腳踏喺2個月內賣咗1,000個，反應唔錯。」店內大大小小的產品，售價由$30至$4,000不等，部分電子產品更設置獨立電子介紹屏幕，播放設計者提供的產品介紹短片，讓客人了解其用法及背後理念。

用app輸入時間表，表面會顯示有日程的時間為黑色，空閒的則為白色，方便提醒自己一日的行程。Calendar Watch智能日曆手表 $2,799

本身從事金融科技行業近11年的Damien，因想爭取時間多陪家人，故於15年決定辭去需經常出國的工作，並伙拍友人開設Backer Stores創業，「見市面上未有賣用眾籌方式集資生產貨品嘅鋪頭，我哋打算向呢個方面發展。」

不用時，厚度可以摺合到減少一半，方便收藏。Barracuda 摺合式行李箱 $2,799

K11多中產客

經朋友的介紹下，他們於荔枝角租下1,000呎鋪位，Damien表示：「當時嘅客人以office客、街坊及文青類為主，office用品就最受歡迎，好似不倒杯及靜電貼紙。半年後，開始有唔同嘅商場主動聯絡我哋租鋪，我哋最後揀咗K-11，因為商場以藝術及設計類型為主題，同我哋嘅目標客群相似。」Damien更在租鋪前，進行實地考察，觀察人流及客人類別，符合預期便正式搬鋪。「搬去K-11後，客人類型有明顯轉變，多咗中產及對設計元素有要求嘅人士，所以揀貨都要稍作改變。」

Damien表示自己都有用此產品，「帶小朋友搭飛機最好用，可以將腳踏搭起至座位高度，令小朋友可以伸直腳，活動舒適啲。」Fly LegsUp $529

找到鋪位，便要找入貨門路，他們通常會到Kickstarter、indiegogo、flyingV及嘖嘖zeczec等眾籌網站找貨源，Damien說：「最初我哋未有成績及規模，喺邀請設計者合作時，要花好多時間解釋我哋嘅運作方式。加上好多設計者都喺海外，我哋經電話及email來往好耐先有共識，為咗減省時間，我哋慢慢改良到用表格形式介紹。」

Damien指最近很受歡迎的是這款智能水壺，「呢個智能水壺目的係吸引小朋友飲水，水壺上有電子寵物，好似我哋細個養他媽哥池，可以同佢玩及餵食，我個小朋友都有用緊。」Gululu 智能互動水壺 $999

在選擇貨品方面，Damien會挑選已製作實物的品牌，「以自己同拍檔嘅興趣行先，大多揀日常生活會用到，又方便到生活嘅產品。」但他也遇過反應不太好的貨品，「有次入咗一款designer bag，設計者冇乜跟進，佢喺自己個facebook及其他網上媒體都唔太積極配合，結果好少人知。加上每個定價$4,000，又唔肯調整，根本冇人買，結果放咗兩個月就要下架。」自此，Damien於挑選合作對象時，要了解他們可配合的程度，才進行宣傳事項。

年輕人着重細節位，背包的LED燈可自行用app輸入表情符號及數字，有個人化的設計。Backpaix 智能表情背包 $1,999

要睇市場反應調整

開設實體店，確實吸引不少設計者找他們合作，更得到真實的市場反應，讓設計者改善產品，Damien有感相輔相成，「大部分設計者都覺得自己嘅產品係天下無敵，但再好嘅設計，都要睇市場反應。我哋會反映畀佢哋知客人嘅意見，有時係定價太高，有時係產品嘅質量問題。試過有塊電子滑板本身賣$4,799，對多數客人嚟講真係太貴，我哋提議佢調整到$3,688，即刻賣多咗3成。」

客人Elton表示：「我一向有留意gadget產品，今次睇啱咗個鎖，可以用左右組合嚟開鎖，又可以喺電話下載app嚟控制，check到有冇人開過個鎖。喺呢度有實物睇，仲可以試用埋，了解用法及質感，購物嘅意慾都會大啲。」

現時平日每逢6:30pm放工時間後，及星期六日最多人，Damien說：「每逢節日都係旺季，好似聖誕節、雙11、情人節及開學月份，生意比平時多3至4倍。客人以25至45歲為主，男女嘅比例約為6比4，男仔鍾意買袋及電子用品，女仔就鍾意買家庭用品及小朋友用品。」

Airbolt智能旅行鎖 $559

設計者Ravi Varma Mesalight表示：「我係來自紐約嘅設計者，生產嘅產品係便攜式露營燈。喺朋友嘅介紹下認識咗Backer Stores，覺得呢度幾適合賣眾籌嘅產品，嚟緊3、4月就有得賣我嘅產品。」

Mesalight 露營燈，售價待定。

TMT TELCOM LTD負責人Walton表示：「我哋嘅產品係無線音響組合，與Backer Stores合作後，多咗一個實體展示嘅途徑，生意都有所上升。實體比起online嘅好處，係畀到客人實際感受音響嘅質量，Jonathan仲幫我哋擺咗個立體聲setting，吸引到唔少人停低試試。」

TMT 5.1 無線喇叭 $3,999

參考來源：青雲路