申請專利 設計潮款陀飛輪

Felix（左）及Keith（右）希望憑自己的努力，打造出新的香港手表品牌，在15年成立Phantoms，主打科技及未來感設計的手表。

「市面上陀飛輪嘅表面設計唔係圓，就係方，我哋就設計成類似棺材嘅外形，叫time-confin，仲申請咗專利。表面望落唔規則，層次展現較豐富，好有時代感，一推出就受到唔少人歡迎。」手表品牌Phantoms的創辦人Keith和Felix表示，由他們提供設計概念，然後交給設計師繪畫圖樣，變成實物。Phantoms現有推出陀飛輪及自動機械手表，售價由$5,000至$15,000不等，Keith說︰「現時有9成客戶喺網上訂貨，香港、澳門、新加坡都有，年齡主要係30歲至50歲嘅男士。」

Felix及Keith自小便被家人送去温哥華生活，2人就讀同一間中學而認識，其後Keith在大學修讀工商管理，Felix則修讀電子商貿，13年畢業回港各自發展。Felix說︰「我做過online marketing、寫網站，又搞咗個online shop賣眼鏡；Keith就做金融投資嘅工作。雖然我哋嘅工作唔同，但不時聚會一齊玩。」

Force系列陀飛輪手表 $15,00，酷似棺材的外形，冠以time-confin之名，新穎的外形及富未來感的設計，受到不少人士的歡迎，這設計更申請了專利。

陀飛輪款式少

今年27歲的Keith有一個創業夢，所以找Felix一同合作創業，「工字不出頭，我一直都想搞生意，我同Felix都鍾意潮流飾物。我哋有次傾開覺得市面上嘅男裝表選擇少，追求時款嘅陀飛輪就更少，令我哋萌生創立一個手表品牌，打算用有設計嘅陀飛輪作頭炮，希望吸引到注意及有話題性。」

Force系列手表的設計，吸引到中國知名手表品牌海歐的注意，讓Phantoms得到與大品牌合作的機會，手表背面印上了海歐的品牌標誌。

15年，他們創立Phantoms，並到眾籌平台Kickstarter集資。「首先我哋請咗個手表設計師，以科技感為主題，設計咗Soul系列嘅陀飛輪手表，之後上網搵到有整陀飛輪機芯技術嘅海鷗品牌，佢哋喺上環有代理商，我哋畀咗4萬搵佢哋整咗隻成品出嚟。我哋拎隻成品拍宣傳片，寫計劃書再擺上Kickstarter，估唔到好快就有一班客戶支持，用1個月集資約50萬嘅資金。」

與海鷗合作

有了資金後，Keith開始找廠商小批量投產，同時他們推出Force系列，吸引到海鷗與他們合作。「我哋打算走精品路線，每款表最多生產100隻，客人冇咁易撞款，亦逼使我哋要不停有新嘅設計。同一時間，我哋以類似棺材形狀設計咗Force系列，拎去代理傾投產時，佢哋總公司竟然話好欣賞我哋嘅設計，仲邀請我哋去天津嘅總部傾合作。佢哋肯幫我哋小批量生產手表，而Force系列機背就加上海鷗嘅logo，希望以此開拓國際市場。」

Keith（右）及Felix（中）不時會與手表設計師討論設計概念，把想法變為實物。

其後Felix着力於市場推廣上，開始拓展香港及海外的零售網絡，「我哋開設咗網站作銷售渠道，亦有參加香港鐘表展，當中有產品發佈會，令品牌畀嚟自唔同地方嘅人認識，好似中東、加拿大、美國及歐洲都有買家表示有興趣，對我哋都係一種鼓舞。」

Phantoms創新及大膽的表面設計，吸引了時裝設計師Dorain Ho，找上他們聯乘推出《正義聯盟》系列的自動機械手表。 蝙蝠俠手表 $7,980

正義聯盟手表

另一方面，Phantoms創新及大膽的表面設計，吸引到時裝界的注意，Felix說：「當時時裝設計師Dorain Ho正與華納合作，為配合電影《正義聯盟》上映設計唔同嘅商品。Dorain喺網上見到我哋嘅手表設計覺得唔錯，就搵我哋合作，為各位super hero設計自動機械手表系列。當中要將各super hero嘅代表顏色及標誌融入手表上，都唔容易，前後用咗半年時間修改，嚟緊會推出市場。」

神奇女俠手表 $7,980

Keith及Felix的目標是把Phantoms打造成香港的手表品牌，他們表示有很多地方需要增強及改進，「現只推出6款系列嘅手表，款式有限，會陸續推出更多款式，畀客人有更多選擇。另外，我哋會同更多嘅表行傾合作，除咗香港外，日本、美國等地區都傾緊銷售點，目標係將Phantoms推向全世界。」

點入行？

Keith表示行業對鐘表設計師有需求，有興趣的人士可先修讀有關鐘表的設計課程，掌握一定的設計概念及技巧，「首先要對機械有興趣，最好有自己嘅風格；亦要時常留意世界及身邊發生嘅事，因為需要用新元素嚟設計手表。入行由初級鐘表設計師做起，月薪約$12,000至$15,000。」現時身為Phantoms創辦人的Keith，年薪約50萬。

Phantoms phantomslab.com

參考來源：青雲路