以過來人身分 開有特殊學習需要教育中心
在香港，無論學校及家長均十分看重學習成績，但對於就讀主流學校而有特殊學習需要的學生來說，難以透過一般的教學方法去掌握知識，導致他們不能應付功課及考試，產生壓力及家庭爭吵等問題。曾克服讀寫障礙的陳卓琪（ Twiggy）與拍檔，在 14年創立博雅思教育中心，以自身經驗結合外國理論，設計出借助視覺及動作的學習方法，幫助有特殊學習需要的學生去學習，克服障礙，希望他們不再被成績所束綁，找到自身的價值。
「試過有讀寫障礙嘅學生喊住同我講之前補習，老師叫佢抄個英文單字 200次，佢都係記唔到，其實讀寫障礙嘅人唔似普通人，能夠將文字進行解碼及記憶，難將字母與字母之間串聯起嚟。於是我哋設計咗一套借助視覺及動作嘅學習方法，幫助佢哋學習及記憶，例如根據英文字形狀設計嘅咭紙，或者叫小朋友用泥膠砌出英文字，以圖像、觸覺及形狀，強化佢哋嘅記憶。」 Twiggy認為只要找對方法，每個小朋友都能獨立自主地學習。
博雅思教育中心是一間專為有特殊學習需要的學生，提供學習方法，創辦人 Twiggy表示服務範圍主要是小一至中二的學生，「有特殊學習需要嘅小朋友，包括讀寫障礙、高功能自閉症及專注力不足等，佢哋都係我哋嘅服務對象。收生前我哋會同每個學生做 45分鐘評估測試，睇吓佢哋啱唔啱我哋嘅學習方法，對佢有用先會收。另外，我哋亦會開班教家長及學校老師，點樣去幫有特殊學習需要嘅小朋友學習。」學費方面， 1對 1教學，每小時約$700至$1,200； 1對 4小組教學，每小時約$300至$350。
今年 38歲的 Twiggy，現時擁有兩個碩士學位，其實她也有讀寫障礙，學業成績更曾強差人意，「細個好驚返學，考試唔合格，做功課做到發脾氣，小五仲留咗次級。屋企人見我成績差，送咗我去英國讀中學，去到中四時一次模擬考試，老師奇怪我所有答案都寫錯，於是佢問我答，我又答啱答案，之後我接受教育心理學家嘅評估，診斷到我有讀寫障礙。」
Twiggy表示獎勵會令小朋友學習更有動力，於是設計了類似銀行簿的積分存摺，記錄小朋友做得好時給予的積分，然後可以用積分換取小禮物。
不少有學習障礙的小朋友，對順序背出 26個英文字母會有難度， Twiggy表示可以嘗試叫他們倒序背誦，加強他們對字母間聯繫的記億，之後便可以順序背出 26個英文字母。
小朋友透過用泥膠砌出英文字及字義，令他們透個觸覺感受字母的形狀，同時以圖像聯繫英文字的意思，強化記億。
圖像法將中文字圖像化，例如「葉」字，將字的每個部分都畫成不同的圖像。頭上部首是兩個十字形的花瓣，表示這字與花草有關，中間畫了戴了一頂帽的花仙子，下身穿了一條裙，以故事形式令小朋友能夠記得筆劃及字形。
遮蓋法有些學習障礙的小朋友對於理解數學文字題會有難度，如例題中小朋友有時會分不清楚數式應該用加號還是減號，適當地遮蓋數字，縮短需要閱讀的內容，可以對解題有幫助。
找方法幫助學習
Twiggy在學習上開始得到額外支援，學校安排她以抽離形式一對一上課，她自己亦尋找不同的學習方法，「成績仍然時好時壞，讀得好辛苦先升到 A level，第一年就讀唔掂俾人踢出校。之後去讀 college拎到 distinction，就返咗香港讀香港大學，第一年係讀 BBA，但都係讀唔掂，之後轉咗讀體育及運動科學，期間慢慢歸納出啱自己嘅學習方法，例如用 mind map、遮蓋法等，慢慢追上課程，最後都順利完成學業。」 04年，大學畢業後， Twiggy先後去過國際學校及本地學校任教體育及全科，但她最希望是用自身經歷幫助有特殊學習需要的學生，於是她攻讀社工及特殊教育兩個碩士課程。 09年完成課程後，她加入了一間 NGO的特殊教育中心擔任主管及導師，「當時參加咗兩星期嘅教育考察團，睇到外國運用體育幫助有特殊需要嘅小朋友建立自信，唔一定集中喺成績上，令我都想喺香港建立類似嘅支援服務。」
現時博雅思教育中心有 13名老師， Twiggy不時會與老師開會，討論學生的學習進度，以便在教程上作出適當的調整及安排。
最初先發掘潛能
14年， Twiggy決定與志同道合的拍檔 Odilia，一同創立博雅思教育中心，「 Odilia係我之前喺做義工時認識，佢都係一名老師，對於幫助有特殊學習需要嘅小朋友好有心。當我有創辦中心嘅諗法時，佢都希望一齊搞，我哋喺油麻地租咗個 300呎嘅單位開始，主力發掘有學習障礙嘅學生潛能，好似廣告及產品設計、社會問題研討及曲棍球班等，發展佢哋唔同嘅長處，希望藉此加強自信。」 理想是美好，但現實令 Twiggy及 Odilia要作出改變，「最初每個月只有 6、 7名學生，每人得 3、 4千人工，有家長直接同我講，知我哋係為班小朋友好，但佢同小朋友都係因考試唔合格、完成唔到功課，而要面對成日鬧交嘅問題。家長建議我哋不如試吓幫學生改善成績，之後我哋開設功課輔導班，幫學生應付功課。我哋主要靠家長介紹畀其他家長，有咗口碑後，生意慢慢好轉。」
教中英數學習方法
Twiggy與 Odilia明白授人以魚不如授人以漁， 15年，中心轉而開辦提升學習能力的課程， Twiggy說：「只係應付日常功課始終唔長遠，教到班小朋友點樣去學習先解決到問題。我去美國報讀 Davis學障矯正療程，學習外國專家點幫有學習障礙嘅小朋友，然後結合自己之前嘅學習經驗，與 Odilia一同編寫教學課程，?家會有中英數 3個範疇嘅學習方法去教小朋友。」 今年年中，博雅思教育中心在油麻地開設新中心，現時中心有 13名特殊教育老師，曾教授超過 800名學生。 Twiggy希望中心能夠幫助更多有特殊學習需要的小朋友，「約 85%嘅學生由最初入嚟寫唔到簡單嘅句子，半年後可以閱讀及寫到簡單嘅段落；學生由考試默書都唔合格，到應付到，亦減少咗佢哋返學嘅壓力，證明我哋嘅課程係 work。我希望接觸及幫助到更多有特殊學習需要嘅學生，唔止喺香港，仲想去內地及新加坡等地方，推廣我哋嘅課程。」
Twiggy說︰「我哋呢兩年都有同廣告公司合作推出有關讀寫障礙嘅廣告，例如喺中環蘭桂坊擺設特別設計嘅路牌及海報，又整咗個會不斷改變文字次序嘅 MC問答網站，畀一般人體會讀寫障礙者嘅苦惱，藉此令更多人了解及關注有讀寫障礙嘅人士。」圖為 Impossible Test網站，問題內的文字會隨時間呈現不同次序，讓人感受讀寫障礙人士的世界。
博雅思教育中心的課程分為個人教學及小組教學，但小組教學最多也是 4人，令老師可以與小朋友有更好的互動。
有時可以拿來玩，以鼓勵他們表現得更好。
每位老師在任教前都要接受培訓， Twiggy說︰「會講解每個教材點用，亦會叫佢哋sit堂睇其他老師點上堂，之後我會試堂，叫佢當我係小朋友咁教一次，評核合格先會畀佢教小朋友。」
博雅思教育中心 http://www.boazeducation.com
Amber 11歲
之前上課好易會發夢，又聽唔明老師講乜嘢，?家會易集中咗，聽到老師嘅講解，功課已經可以應付到。
趙太 家長
之前我聽 Amber話做功課會頭暈，成日會跳行，喺二年級下學期時診斷咗佢有輕微讀寫障礙及專注力不足。於是我上網搵到博雅思教育中心，有專幫呢類小朋友嘅學習課程，就帶咗佢嚟上堂。?家佢讀咗 3年幾，學業上有改善，錯字少咗，亦唔會成日話頭暈。
開業成本
租金︰$30,000（ 2按 1上）
裝修︰$50,000
設備︰$50,000
總投資：$130,000
每月開支
營業額︰$390,000
租金︰$32,000（兩間中心）
人工︰$200,000（ 2名老闆+13名全職及兼職老師）
雜費︰$10,000
盈利：$148,000
參考來源：青雲路
