經驗結合品味 名牌買手開自家品牌飾品店

Lane's Accessories現時有3間分店，分別位於中環威靈頓街，中環1號廣場及圓方。Ivy身為創辦人，負責店中的採購及營運管理，「店內有五十幾個飾品品牌，包括頸鏈、頭飾、耳環、頸巾及手鐲等，都係我每季去歐洲採購返嚟。」

之前Ivy當過Lane Crawford、Prada及Valentino的買手，會有入貨門路及鑑賞能力， 能挑選高質素的品牌， 例如Franco Ferrari、Jenny Packham、Jennifer Behr等，店內亦有出售本土設計師的作品，「見到佢哋嘅設計及用料都好有質素，唔會比外國輸蝕。」

Ivy會向員工講述飾品品牌的資料及設計特色，讓她們可以向客人進行講解。

Ivy表示Lane's走中、高檔的路線，飾品價錢由$500至$20,000，頸巾售價則由$2,000至$15,000不等，主要的客群是有經濟能力及對衣着打扮有要求的女士。「行街買嘢可以好隨心，但買手入貨時要有自己眼光之餘，仲要結合店鋪嘅商品銷售情況，主要嘅目標客群及預測潮流嘅走向，感性之餘又要理性，一啲都唔易做。」

Lane's在08年創立至今，Ivy的選貨目光功不可沒，但她本在加拿大修讀心理學，畢業回港後加入了一間地產發展公司做推廣銷售的工作，「做咗年幾覺得份工唔啱做，之後想轉份自己鍾意嘅工。我諗起行連卡佛時，有好多靚嘢賣，咁啱見到連卡佛採購部請人，就寄封求職信試吓，點知真係有機會去面試。記得喺面試時，我有講對時裝採購係冇乜認識，但如果真係請我，我乜都肯去做，估唔到最後真係請咗我。」

Jenny Packham是英國王妃Kate Middleton所鍾愛的品牌，獨特的設計，及髮箍上鑲嵌着精緻的水晶，充滿古典味。Jenny Packham水晶髮箍 $3,980

93年，Ivy正式加入連卡佛擔任助理採購員，負責女裝鞋部，「初入行時，我對鞋嘅品牌都講唔出幾個，惟有平時多睇多問，留意時裝雜誌。上司每次去意大利、法國採購時都會帶埋我去，我會留意當地人嘅衣着，及留意上司同供應商點傾。上司成日叫我整理報告，當時唔太明整嚟做乜，之後先知上司會跟據銷售報告同供應商傾，及作為入貨嘅參考。」

工作了兩年多，上司見Ivy積累了一定經驗，讓她負責女士飾品及手袋的採購，「採購飾品及手袋要重新認識品牌及物料，不過有啲嘢都係相通，例如買貨除咗考慮銷售外，仲要諗埋商品放喺店面嘅擺位、顏色嘅配搭，例如有時明知黑色平底鞋最好賣，但成間店只擺呢隻色唔好睇，你都要入少量其他色及鞋款，陳列出嚟會好睇啲。成個採購過程約3星期，你要睇3、4百款商品，從中挑選20至30款，落決定真係好困難。就算睇啱咗，都要畀段時間自己冷靜吓，可能等半日左右再落決定。」

Ivy表示這款法國品牌的法式喱士手袖及領口，想不到會受客人的歡迎，「原本係自己鍾意及想令間店多啲特色商品，預佢唔太賣得，但估唔到好多客人鍾意，仲成為店內嘅熱賣品。」法式喱士手袖 $3,280 / 法式喱士領口 $3,280

97年時，Ivy決定外闖，先後在Prada及Valentino擔任亞太區採購經理，「當時要負責中國、台灣及新加坡等地區嘅商品採購及銷售情況，成日要周圍飛。」

最後在08年，Ivy決定完成心中的理想，開設專賣女士飾品的店鋪Lane's，「做大品牌其實好辛苦，身體開始唔太捱得，但自己對採購飾品仲好有興趣，於是決定開自己嘅鋪頭。初時客人入到嚟，會覺得呢度唔係名店，賣啲嘢點解咁貴？我要向客人介紹番品牌嘅歷史及特色，不過點都有識貨之人，見到飾品嘅手工及用料靚，慢慢多咗人嚟幫襯。」

除了出國採購外，Ivy多會在辦公室查看店鋪的銷售報告，作為入貨參考及推測客人的喜好，減少入錯貨的機會。

14年，Lane's新開設主售新娘飾品的Lane's Bridal，Ivy說︰「多咗客人嚟問結婚時點樣配搭飾品，我又見坊間少專賣婚嫁飾品嘅專門店，於是就開咗Bridal。店中嘅飾品以白色、粉色及華麗為主，畀新娘易啲襯婚紗。」

未來Ivy希望店鋪能提供更全面的服務給客人，「前排去新加坡讀咗個有關個人色彩分析嘅課程，嚟緊會開設workshop，教客人點樣挑選啱自己膚色嘅飾品，希望吸引更多識得欣賞嘅客人。」

多層羊毛及法國喱士頸巾，出自本地時裝設計師Hidy Ng之手，用上羊絨毛及法國喱士，以多層設計，手工縫上金屬配件及珠飾，溫暖而有美感。$10,280