繼承父業 創立香港豆品品牌

為了不讓父親的心血消失，Jeff接手家族生意，用了三十多年時間，創立出壹品，讓自家的豆製品融入到市民的生活中。

走進位於元朗石崗的新佛香豆品廠，Jeff表示廠房是24小時運作，不斷製作豆腐、豆漿、豆腐花、豆乾及豆卜等不同產品，「我哋嘅產品堅持香港製造，採用非基因改造嘅黃豆，及不加防腐劑及化學物。每個時段都有產品生產，然後送貨畀唔同嘅商戶，產品就夠晒新鮮。」

Jeff（右）不時會巡視廠房，確保製作過程不會出現問題。

今年48歲的Jeff是新佛香食品有限公司的行政總裁，同時是壹品的創辦人，公司大小事務都親力親為，「平日我都會留喺工廠，監察製作過程，亦會與同事開會，決定市場推廣、產品開發、業務發展等，我哋產品會批發畀街市、零售商及食肆。」

Jeff的父親在1958年在觀塘創立豆腐工場佛香齋，製作豆品供應給街市攤販，其後工場遷至元朗，改名為新佛香，而Jeff自細在豆腐工場長大，「屋企人成日會喺工場做嘢，細個會去玩，但就冇掂過整豆腐。」

新佛香豆品廠24小時運作，每個時段都會安排生產不同的豆品。

家人返對回廠幫手

在城市大學修讀資訊科技的Jeff，95年畢業後，做了年多的程式編寫員，其後眼見正在打理豆品廠的父親身體漸差，決定接手豆品廠。「當時programmer前景唔錯，喺香港做廠反而係夕陽工業，所以屋企人反對我返廠幫手，但我睇得出阿爸放唔低豆品廠，於是我話：「『我想幫阿爸手』，家人見我好堅持，最後都同意。」

隨着Jeff的努力，現時新佛香豆品廠每天生產超過10萬件產品，廠中大多是採用自動化設備，以應付生產需求。

為接手豆品廠，對廠內事務都不熟悉的Jeff，決定留廠學藝，「整豆腐係凌晨12點開始，磨豆、隔渣、煮漿、凝固等，早上就出貨畀人，自己會做埋司機，之後又開始浸黃豆，準備夜晚整豆腐。喺工廠工作時間長，當時我直接同啲師傅一齊喺工場留宿，學習製作技巧、生產程序及廠房管理，咁樣就過咗3年。」

攻連鎖飲食集團

當時內地食品大量湧入，豆腐市場也打起了價格戰，為了求存，Jeff要找新的發展路向，「街市只係睇邊個來貨平就入邊個，最終只會變惡性競爭，而大型超市及連鎖飲食集團對豆製品係有需求，價錢未必係第一考慮，對衛生及食品安全會有高要求。我打算向呢個方向發展，將資源放喺食品衞生上，廠房自動化，但凝固及壓榨豆腐依然保留人手處理，以保持質素。」

現時公司發展漸有規模，Jeff不時與同事開會，討論公司的發展方向，及產品推廣策略。

02年，新佛香開始生產樽裝豆漿，同時亦打開了超市及食肆市場。為了有更好的發展，到07年，Jeff遂成立自家品牌壹品，「之前都係幫人代工豆品，發現做咗幾十年豆腐，冇乜人識新佛香。要有更好嘅發展，有個自家品牌會好啲，加上我哋對豆品嘅質素有堅持，自家品牌可以自己話事。」

連渣煮更有豆味

為了經營壹品，Jeff不斷對豆品作出改善，及推出新產品，「傳統整豆漿會係將黃豆磨成漿，然後隔渣拎去煮，但我試過日本嘅豆漿豆味更濃，原來佢哋會連渣拎去煮，然後先再隔渣，於是我哋轉用呢個方法，加上比例調配，味道會同市面好唔同，熟客一飲就知係我哋壹品嘅豆漿。另外，有客人向我哋建議想食得更健康，於是我哋推出咗有機豆腐、無糖豆漿等產品，畀市民有更多選擇。」

Jeff認為公司要發展就要開拓不同的市場及產品，於是推出有機豆漿、黑芝麻豆漿，有機豆腐等不同的新產品。

在Jeff的步步經營下，豆品廠上年的營業額超過1億元，他希望把壹品豆漿打造成家傳戶曉的香港品牌，「香港製造嘅食品唔會比外國差，質素會有保證，嚟緊會開發豆腐味嘅沙冰、麵包、雪糕等，仲會開設門市，專售自家嘅豆製產品，畀市民食得健康又放心。

除了豆品外，壹品亦有推出即食涼粉。

參考來源:ecjobs青雲路