搞智能理財app助港青追夢 台女做過百次訪問搜集資料

採訪當日，記者來到香港大學創新及創業中心「iDendron」，這個共享工作空間容納了十多間初創企業，近門口第一間是Planto。Jessica與行政總裁Ankit Suri介紹了Planto的功能，分規劃目標及理財預算兩大部分，「喺現有版本中，用戶可規劃買樓、旅行兩種目標，之後會加入兒童教育及自訂目標功能，規劃由買樓至買iPhone等目標嘅儲蓄計劃」。

Jessica常常在街上做訪問，與香港年輕人談談理想與現實。

追蹤財政狀況

Planto應用程式用戶可根據用戶輸入的收入、每月儲蓄等數據，計劃他們的上車夢。Ankit說：「用戶可以揀想住邊一區、乜嘢類型屋苑及單位，Planto會計算目標是否可行及點先可以實現，如每月要儲幾多錢、儲幾耐錢等。用戶同樣可輸入旅遊目的地、住宿等要求，計劃旅遊洗費。設定好計劃後，應用程式會自動追蹤目標進度。」為節省輸入數據時間，加上不少大懵及忙碌的人可能連自己有多少身家都計不清，Planto可連結8間本地銀行賬戶，方便用戶了解自己日常儲蓄及開支，按實際財政狀況計劃目標。

Jessica與創辦人Ankit（前右）、Yousaf（後右）及Taha（後左）曾是在銀行工作的同事。

夢想做李嘉誠

Planto的電腦程式部分由Ankit等3位創辦人主理，Jessica則從收集用戶意見、宣傳、招聘等工作都要一腳踢，至今共訪問超過100位香港年輕人對理財及人生目標的疑難。「我經朋友介紹，或者喺facebook度主動搵被訪者，為訪問由天水圍至柴灣都去過。好多人目標都係想買樓，但覺得相關資訊好散亂，唔知點樣計劃；有人話好想儲蓄，但因為怕麻煩而冇計劃」。她亦走進香港多間大學、旺角街頭等，拍訪問短片作宣傳之用，令她感有趣的是「好多人都話夢想係做李嘉誠」。潛在用戶的意見對改善應用程式非常有用，「喺訪問過中，發現好多人認為結婚策劃係麻煩事，我哋正考慮緊喺Planto加入呢項功能」。

Planto辦公室位於香港大學位共享工作空間。

認定香港有前景

因父親工作在外地工作的關係，Jessica在新加坡出生，又曾隨父親到英國定居，06年到香港升學，6年前於香港大學會計及金融學系畢業，先後在本港的銀行及金融機構工作。「我一直有幫慈善機構做義務顧問，希望從事幫到人嘅工作。喺銀行工作時，認識到當時仍係同事嘅Planto創辦人。佢哋去年11月成立Planto，我今年3月開始喺度全職工作」。

Jessica把收集到的用戶意見與同事分享，以改良應用程式。

對台灣人友善

雖然Jessica的英文、廣東話及普通話都十分流利，但因家族有荷蘭血統，令她的外表不太像台灣人或香港人，不時被問及國籍，「有時被訪者知道我係來自台灣，都會十分驚訝，訪問角色馬上調番轉。幸運嘅係，香港人對台灣人非常友善」。她認為香港是發展事業的理想地方，「喺startup工作乜都要負責，差唔多每日OT，但工作彈性高、挑戰大。香港係個充滿機遇嘅地方，留喺度發展好啱我自己」。

理財本身是件複雜事，因此Jessica表示Planto的介面會盡量做到最簡單。

測試版8月推出

Planto的iOS及Andriod測試版即將於8月推出，Jessica與團隊正為宣傳密鑼旗鼓，「最近去咗灣仔會展舉行嘅創科活動『RISE』，認識多啲行內人及介紹我哋公司，唔少人都話幾鍾意我哋個app，反應算唔錯。另外亦嘗試緊聯絡大學，希望合作舉辦理財講座等活動。理財本身係幾個人嘅事，我哋希望能與用戶建立信任及共同感」。

Jessica與同事到「Rise」活動宣傳Planto。

為準備推出應用程式，Jessica與團隊常常要開OT。

參考來源:ecjobs青雲路