鑽研花藝近30年 開班授徒

香港插花藝術學院院長兼創辦人的Theresa負責導師培訓、課程設計、推廣等工作，她表示插花受到不少現今女士的歡迎，「學院提供短期興趣班到專業導師課程，當中包括日式、法式、荷蘭式、英式、簡約及商業等各類花藝技巧，嚟報讀嘅人士9成係女性，為興趣及工作需要都有。」

鑽研花藝近30年的Theresa希望可以把自己的技藝傳授出去，同時令香港與國際花藝可以接軌，於是創立香港插花藝術學院。

由興趣出發

修讀經濟出身的Theresa，畢業後投身銀行界，在偶然的機會下接觸到插花，更慢慢發展成個人事業，「做銀行時，有客戶介紹我去玩插花興趣班，整出嚟嘅完成品得到朋友及屋企人嘅欣賞，幾有成功感，漸漸對插花好有興趣。其實自己心中一直有個創業夢，見到花藝有發展潛力，於是喺87年開設花店，接單製作花藝擺設，主打商業客戶。」

現時Theresa負責培訓學院的導師，「我哋仲會定時安排導師去外國進行交流，開拓佢哋嘅眼界。」

開學校發揮所長

隨着Theresa不斷鑽研插花技藝，為了發揮所長，她在89年創立香港插花藝術學院，「花店嘅競爭大，要不斷提升自己水平，當時不時會飛去法國跟唔同嘅花藝大師學習，都學咗2、3年。有次有會所邀請我去教插花班，發覺教班好有滿足感；另外，花店未必用得晒我所學嘅嘢，於是最後決定開埋學院，將自己嘅插花技藝教畀更多有興趣嘅人。」\

Theresa以現代時尚感作主題，即席示範插花。

這次插花示範Theresa用上百合、荷蘭劍蘭、芋葉、洋天東、春蘭葉等素材。

課程符合國際資格

Theresa表示學院課程以與國際接軌為賣點，讓學員可以更易投身花藝行業，「當時市面上具國際認受性嘅花藝課程唔多，於是我搵國際花藝大師合作，修訂課程內容，以符合認證資格，增加咗課程嘅認受性。學員喺完成課程後，除香港外，去到外國都可以搵相關嘅工作。」

學院的課程不少都有國際認證，故吸引到外國學員來報讀。

與梵高博物館合作

現時香港插花藝術學院共有4間院校，Theresa希望可以配合市場需要，提供更多種類的課程，「3年前，我哋已喺深圳開設分校，發展入內地市場。其實花藝行業對人才好有需求，我哋有不斷改善課程，令學員可以學到最貼近市場潮流嘅技藝。另外，我哋亦與唔同嘅機構合作，例如最近荷蘭嘅梵高博物館就搵我哋合作，以梵高嘅畫融入課程設計上面，增加咗學員嘅選擇。」

現時香港插花藝術學院有4間院校，圖為灣仔分校。

插花可以陶冶性情，而且成品充滿美感，受到不少女士歡迎。

參考來源:ecjobs青雲路