在無名指上的婚戒,象徵二人恆久的愛情,除了對方外,其實婚戒也會與你生活一輩子,作為有代表意義及個人品味的婚戒,要挑選合心水的就傷透不少新人的腦筋。曾從事珠寶業的Haydn(劉健邦),看到婚戒的發展潛力,在13年創立B.R.H. Diamond Collection(以下簡稱B.R.H.),以性價比高、貼心的服務,及日德製的婚戒作招徠,受到一眾年輕人的歡迎。


BRH 1
為了創業,Haydn特地去修讀DGA鑽石鑑定課程,現時公司採購鑽石亦是由他負責。

Haydn表示日本婚戒質素高及有保證,成為近年不少港人的心頭好,「日本戒指造工較精細,例如珠邊、扭紋都好精緻;另外,日本人對戒指內圈嘅卜身設計好高要求,令佩戴時更舒適,適合近年鍾意簡約又講求細節嘅客人。另外,最近我哋成功拎到日本廠商研發鉑金加硬技術嘅港澳獨家代理,呢個技術令戒指更堅固及唔易變色,能突顯永恆嘅意思,吸引到唔少客人選購。」

BRH 2
Haydn表示客人主要是20歲至30歲,「以求婚戒指嚟講, 現時多會揀70分至1卡嘅鑽戒, 我哋賣緊$25,000至$50,000,連鎖珠寶店會貴一倍,所以我哋有一定嘅競爭力。」

B.R.H.是一間鑽石婚戒專門店,主打日本及德國製的戒指,創辦人Haydn負責管理、銷售及推廣業務,他表示自家店在價錢及質素上都有獨到之處。「德國設計較粗獷型格,日本就係簡約細緻,同時我哋亦有自家設計及提供客製化服務,有唔同嘅風格畀到客人選擇。客人主要係20歲至30歲,我哋嘅婚戒價錢平連鎖珠寶店約40%至60%,以日本婚戒為例,我哋每對賣緊$8,000至$12,000,連鎖珠寶店約售$10,000至$18,000,價錢上對佢哋有一定吸引力。」現時7成生意是來自結婚戒指,另外3成是求婚戒指。

由珠寶銷售做起

修讀市場學的Haydn,11年畢業後加入一間珠寶公司從事海外珠寶銷售工作,「珠寶公司做B2B生意,供貨畀唔同地方嘅珠寶行。當時我主要負責杜拜、澳洲及意大利地區嘅業務,每年要飛成百幾日,向珠寶行推銷入我哋嘅貨品,自己對珠寶冇乜認識,都係邊學邊做,慢慢對珠寶款式、原材料及定價有所了解。」

BRH 3
B.R.H.位於尖沙咀的門市,注重舒適及個人體驗的設計,讓客人可以慢慢挑選合適的戒指。

工作了2年多,Haydn留意到大型的珠寶品牌較重視自由行市場,忽略了本地的年輕客戶,讓他萌生創業念頭。「身邊有唔少朋友開始想結婚,但大家人工都唔高,講起可以買啱價錢嘅鑽石及啱心水戒托嘅地方唔多,呢個亦係普遍出嚟打咗幾年工嘅後生仔會面對嘅情況。我就諗提供賣裸鑽及戒托設計服務應該有市場,於是開始搜索資料,準備創業。」

BRH 4
由最初的一腳踢, 到現時B.R.H.已有8名員工,Haydn會不時與同事開會,了解客人意見及銷售情況。

上門傾生意

13年,Haydn辭去工作, 一人創立B.R.H.,「初時冇資金,連地方都冇租,所有嘢都係一腳踢,我搵咗珠寶設計師設計戒托,再同鑽石廠傾好合作,然後就拎住十幾隻戒指樣辦,靠facebook及透過朋友介紹去搵客。當客人有興趣,就拖個喼揸車上門,上人哋公司、去cafe,連喺車廂內傾都試過。有客人擔心係咪假貨,我會用服務增加佢哋信心,每位新客人我都會花至少半個鐘,詳細講解鑽石嘅知識,亦會講番每粒鑽石都有提供GIA證書,慢慢累積口碑。」
BRH 5
日本製V形PT950鉑金結婚對戒 $11,700
 
在品牌推廣上,Haydn明白價錢及服務才是吸引客人的主因,所以控製成本十分重要,「要keep到個售價,喺租金及宣傳費就唔可以用太多。做咗年幾後,我先喺美麗華商務中心租咗個60呎單位做office,有個固定地點同客人傾。我會將戒指相放上facebook,好多客戶都透過facebook睇啱款式,然後再約上嚟傾。當時我哋以客製化求婚戒指作主打,15年連門市都未開,我就先開咗個工場,買機器搵師傅,方便提供戒指加工、刻字及維修服務。去到16年,我哋先喺尖沙咀開咗間樓上鋪。」
 
BRH 6
日本製PT950鉑金及18K金結婚對戒 $11,800
 
珠寶展找婚戒廠商
 
15年期間,Haydn開始與日本及德國的戒指廠商合作,推出由當地製作的婚戒,「見到市場流行日本婚戒,喺行珠寶展中認識到日本婚戒廠商,於是嘗試同佢哋傾合作,寫proposal,用email傾細節,前後用咗幾個月時間最終都傾成咗。婚戒嘅生意開始增多,之後見市面上未有以德國製作主打嘅品牌,於是搵埋德國廠傾合作。」
 
BRH 7
德國製18K金及碳結婚對戒 $13,800
 
現時B.R.H.的生意漸上軌道,上年更在澳門開設新分店,上年的營業額超過2千萬,Haydn希望品牌發展能更上一層樓,「最近香港門市搬咗去1,600呎嘅樓上鋪,希望提供更舒適嘅環境畀客人購物,我計劃嚟緊喺港島區及內地二線城市開分店,令更多人方便買到我哋嘅產品。」
 
 
資料來源:青雲路